Folhas - Letras & outros ofícios nº 12

AVEIRO



Digo Aveiro
digo luz
e mar inmenso.

Digo Aveiro
poesía
sentimento.

Abrazas a auga
co lume dos teus ollos.
Somerxida no azul
inundas o horizonte.

Na area conxugas os reflexos.
E bebes a sorbos
a maxia dos teus silencios.

Mar ondulante
de luces transparentes
onde florecen as sereas
e se mesturan as fronteiras.

Atravesas a cidade
tatuado na brisa
con ese raio de sol
que colorea os teus canles.

Nun navío de cores
sucarei os espazos.
Ireime e tornarei
enchida de burbullas
sementes e palabras.


Tornarei
cando o teu rumor me chame.
Cando a luz da túa auga
os meus soños ilumine.

Digo Aveiro
brilla a lúa
baila o vento.

Digo Aveiro
digo luz
e mar inmenso.


Asun Estévez
(Pontevedra)